منتديات افا كاراس ومارجرجس بالغابات
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.



منتديات افا كاراس ومارجرجس بالغابات
 
الرئيسيةأحدث الصورالتسجيلدخول

 

 جايي المسيح اليوم عندي عَ الغَدا

اذهب الى الأسفل 
كاتب الموضوعرسالة
سعاد
الادارة العامة
الادارة العامة
سعاد


عدد المساهمات : 22227
نقاط : 30251
تاريخ التسجيل : 10/10/2014
الموقع : لبنان

جايي المسيح اليوم عندي عَ الغَدا Empty
مُساهمةموضوع: جايي المسيح اليوم عندي عَ الغَدا   جايي المسيح اليوم عندي عَ الغَدا I_icon_minitimeالجمعة يونيو 02, 2017 6:39 am

جايي المسيح اليوم عندي عَ الغَدا
------------------------------
راح الغَني بـِ الهيكل يزور المسيح
وقَـلّو يا عربـون المحبه والفِدا
جارَك أنا وساكِن بـِ هالقصر الفسيح
بدّي بـِ بيتي يا يسوع تزورني
وتقبَل عزيمه بالقصر عَ شي غَدا

قَلّو المسيح بزورَك وعندي ثِقه
إِنَّك إنت إنسان من أهل التُقى
حَضِّر شموع القصر للملقى الكبير
لكن ما فيّي قِلّك بأيَّـا نهـار
وأيَّـا دقيقه مُمكِن يتمّ اللِقا

وعاد الغَني بنيّه سليمه وطيّبه
يحَضِّر بقلْب القصر لقمه طيّبه
وحتى بمباهِج هالدني يرضي المسيح
صار يتغاوى، وتا يحكي يستريح
وزيّن القصر بثروُتو المتهيّبه

وتاني نهار بمطلَع الفجر المنير
معَتّر فقير، بيقصُد القصر الكبير
قَلّو دخيلَك يا غَني لعندَك ضمير
طعَمْني، سقيني، تشفَّع بعمري القصير
عَصَّب إلَـه المال، وتنمرَد كتير
ومتل القذيفه تفجَّر بوِجّ الفقير
قَلّو ما فيّي اليوم استقبل حَدا
جايي المسيح اليوم عندي عَ الغَدا

وتالت نهار بينفتَح بالقصر باب
وبيفوت طفل زغير مش لابِس تياب
قَلّو غمرْني بحضنَك الدافي شوَّي
محتاج إِمّ تحبّني، محتاج بَيّ
بيتي زوايا الشارع، وتختي الرصيف
فرِشلي بقلبَك تخِت، ضَيّفني رغيف
قَلّو ما فيّي اليوم استقبل حَدا
جايي المسيح اليوم عندي عَ الغَدا

ورابع نهار بعجقِة صحون الوقْيد
بتدِّق باب القصر بِنت بفَرِد إيـد
قالِت يا مُؤمِن من رِضا الله عليك
إشفَقْ عليّي بحَسنتَك، تِسلَم إيديك
بَدّي غَني عن كلّ درب يلِمّني
ومتل الحنوني بالحنان يضُمّني
قَلّا ما فيّي اليوم استقبل حَدا
جايي المسيح اليوم عندي عَ الغَدا

وخامس نهار بينفتَح باب الغِنا
عَ جار تحت الدَين قَـوَّس وانحنى
قَلّو يا جاري إنت بتحِبّ المسيح
مشهور بالأخلاق، وبتعمِل مليح
دعَمني برَصيدَك، ما لَقَيْت مأَسَسي
تدفَع عن ولادي القسط بالمدرسي
قَلّو ما فيّي اليوم استقبل حَدا
جايي المسيح اليوم عندي عَ الغَدا

وسادس نهار تسرسَب كتير الغَني
ليش بعدو ما إِجا فادي الدني
إِلاّ، وبيدّق الباب كاهن محترَم
باع الغِنى بالفقر، وبـ الله انغرَم
قَلّو مَدينتْنا يا خَير رجالنا
بحاجِه لـِ مستوصَف يداوي عيالنا
رَدّ الغَني عَ الكاهن الحُرّ التقي
وقَلّو يا بونا غير مَرَّة منلتقي
اعذرني ما فيّي اليوم استقبل حَدا
جايي المسيح اليوم عندي عَ الغَدا

الأسبوع فَلّ وبعد ما طَلّ المسيح
راح الأكِل ضيعان، ضيعان المليح
يوم الأحد من بعد قدّاس الصلا
قال الغَني يا ابن الله بالعُلى
خَسَّرتني وما زرتني بقصري الجميل
عبدَك أنا ما بتربَح لعبدَك جميْل؟؟؟

تبَسَّم وجِه يسوع من بين الجروح
وقَلّو ما بدّي لعندَك ولا نهار روح
زرتَك بطفله معذَّبي ومشوَّها
ما حَنّ قلبَك عَ الجمال وعَ البَها
زرتَك بطفل زغير عاري من التياب
لبَّستني إكليل تاني للعذاب
زرتَك أنا وجوعان بـِ الجار القريب
بهدَلتني وعلَّقتني فوق الصليب
زرتَك أنا وعطشان دغري حرَقتني
حتى سفنجِة خَـلّ ما دَوَّقتني
خَلّيتني أُوقَف على بوابَك ذليل
ما قدِرت تقشَع صورتي بكاهِن جَليل

ما عبدْت الله بذاتَك، عبدْت الصَنَم
وما كنْت راعي، كنت جَزّار الغَنَم
كَرّمت نفسك بالدني وحَقّرتني
وحتى تعَّـوِّم خَزنتَك فَقّرتني
وغَطّيت فيّي مالَك وكَدّستني
وقَدّسِت حالَك قبل ما قَدّستني

وهّلَق إذا بتريد تولَد من جْديد
لازم حضورَك بين أهلَك تسْتعيد
حَـوِّل بوابَك بالعطا دقِّـة قلوب
وعن إنْشِغالَك بالدَهَب والمال توب
قَـدِّم صَلاتك بالشعور وبالعمَل
شيْل اليأس من ناسَك وحُطّ الأمل

وما زال داعيني عَ قصرك بـ الوعي
إلا ما كِلّ الناس تتغَـدَّا معي
مش رح تلاقي بقصرَك الفاضي حَدا
ومش رح تشوف الرَبّ عندَك عَ الغدا

( منقول بتصرّف)




جايي المسيح اليوم عندي عَ الغَدا 18768310

الرجوع الى أعلى الصفحة اذهب الى الأسفل
 
جايي المسيح اليوم عندي عَ الغَدا
الرجوع الى أعلى الصفحة 
صفحة 1 من اصل 1
 مواضيع مماثلة
-
» زوادة اليوم: يسوع جايي لعندك
» قديس اليوم (قديس اليوم 16 آذار القديس خريستودولس (عبد المسيح) البار )
» يا شيخ العيد اللي جايي
» يا طفل المغارة اللي جايي من بعيد
» جايي لعندك يا يسوع يا حبيبي

صلاحيات هذا المنتدى:لاتستطيع الرد على المواضيع في هذا المنتدى
منتديات افا كاراس ومارجرجس بالغابات  :: القسم الادبى :: القسم الادبى-
انتقل الى: