زوادة اليوم: تنوع المواهب
حبّت مجموعة حيوانات إنّو تحسّن وضعها وقرّرت تفتح مدرسه فيها ببرنامجها سباحه وركض وتسلّق وطيران. والتحقت البطّه السبّاحه الماهره بفرع التسلّق وما عادت تعرف تسبح. والتحق الأرنب العدّاء المتفوّق بصفوف تانيه حتى فقد سرعتو المشهوره. أمّا السنجاب البارع بالتسلّق فخسر مهارتو لأنو أمضى ساعات طويله عم بيحاول يتعلّم يطير، والنسر ما عاد قدر يحلّق بالعالي لأنّو كان مضطر يتعلّم السباحه. وهيك فقد كلّ واحد منن موهبتو والنعمه يللي اللّه عطاه ايّاها.
الزوّاده بتقلّي وبتقلّك، بقلب كلّ جماعه في مواهب كتيره بالعيله كمان وبالحي وبالوطن، وإذا كان كلّ فرد مش مهتمّ إلّا بتقليد الآخر رح نوصل لجماعات بتعرف إشيا كتيره بس ما بتعمل شي. شو رأيك اليوم يكون همّك تكتشف موهبتك تنمّيها وتتقنها. وهيك بتصير خميره بقلب الجماعه وبقلب العالم؟
الخميس فبراير 19, 2015 5:24 am
