زوادة اليوم: صلاة الابانا
أحد الآباء اللاهوتيين المعاصرين بيقول: «أخطر من القنبله الذريّه ع الكون هيّ صلاه الأبانا، لأنّو يمكن يخطر ببال شي مؤمن إنّو يصلي الأبانا عن جد ويستجيب لإلو اللّه، ساعة اللي بيقول ليأتِ ملكوتك. وبتزول الأرض والسما وبيحلّ الملكوت.
الزوّاده بتقلّي وبتقلّك، إنت اللي بتصلّي بفكر شارد وطريقه روتينيه، لازم تنتبه لأنّو أنا وإنت فرّغنا صلاتنا من فحواها، من كتر ما منتركها تمرق علينا بدون ما تحوّل حياتنا، مدعوّين اليوم نوقف من كل قلبنا وفكرنا وضميرنا، ع شي جمله واحده منردّدها بكلّ صلا ومننسى معناها. ع سبيل المتل بس، مش نحن منقول: اغفر لنا كما نحن نغفر؟ إذا اليوم قرّر اللّه يستجيب لصلاتنا ويغفر لنا بس قد ما نحن عم نغفر، قولك شو بيصير فينا؟
الجمعة فبراير 20, 2015 5:37 am
