( الغير مستطاع عند الناس مستطاع عندالله)

تعالوا احكيلكم حكاية عم سمعان الراجل الغلبان....

عم سمعان راجل فلاح غلبان

وكان عنده ولد ونفسه يشوفه مهندس زراعي راح باع قيراطين اﻻرض

اللي حيلته وراح دفعله الفلوس وقدمله في الجامعه ....

لكن للاسف سنة ورا سنة والولد بيسقط واخرتها رفدوه

ورجع ﻻبوه بالخيبه ..

ابوه قاله / ازاي يرفدوك من الكلية وانا بايع كل اللي حيلتي

علشان اشوفك مهندس ..

وصرخ وقاله / انت ﻻزم ترجع تاني وراح الكنيسه وصلي سمع ابونا بيقول

( الغير مستطاع عند الناس مستطاع عند الله)

رجع البيت فرحان وقال لولده خلاص انت هترجع الكلية تاني ...

الولد قاله مستحيل يا ابويا ..

رد اﻻب وقال الغير مستطاع عند الناس مستطاع عندالله..

انا رايح مصر بكرة وهرجعك الكليه..

وركب القطر وكانت دي اول مرة ينزل مصر وركب الترماي اللي رايح الجامعة وكان قاعد جنبه افندي محترم ببدله وفضل يحكيله عن ابنه فرد اﻻفندي وقاله وانت بقي عايز ترجع ابنك الجامعه ازاي دة المدير مستحيل يوافق ..

رد عم سمعان وقال

( الغير مستطاع عند الناس مستطاع عندالله)

وطلب منه يدله علي طريق الجامعه ...

راح اﻻفندي قاله تعالي معايا انا رايح....

وفعلا خده معاه وقاله هو دة مكتب مدير الجامعه ...

قام سمعان طلب منهم يدخلوه وفعلا بعد الحاح دخل علي المدير ...

وبص في وشه ولقاه هو اﻻفندي اللي كان قاعد جنبه ...

اتاري عربيته عطلت يومها واضطر يركب ترماي جنب عم سمعان الغلبان

وطبعا ﻷنه عرف الحكايه في الترماي ...

بص لعم سمعان وقاله انت عارف انه مستحيل ابنك يرجع الجامعه لكن

( الغير مستطاع عند الناس مستطاع عندالله)

ومضي المدير علي جواب رجوع الطالب