هو كان شاب طبيعى عنده 18 سنة ، عايش حياة عادية جداا ، فى المدرسة الثانوية وبيلعب كرة سلة وألعاب قوى خاصة الجرى ، وفى يوم حس بألم فى رجله وقرر يروح للدكتور عشان يعرف مصدره ، وبعد الفحوصات اكتشف ان عنده سرطان فى العظام !!
تيرى فوكس كان بيخضع للعلاج الكيميائى برضه زى أى مريض سرطان بس فى يوم وهو نايم حلم بحاجة غيرت مسار حياته، حلم انه لف كندا كلها على رجليه ! فاستغرب جداا لكن قرر ينفذ الحلم ده ..
وكالعادة الدنيا مكانتش مظبوطة مع الحلم بتاعه واكتشف ان رجله اليمين لازم تتقطع !! السرطان كان على وشك يدمر حلمه انه يلف كندا، بس هو قرر يحقق ده برضه حتى لو برجل صناعية .. وصمم يلبس شورت الجرى بتاعه رغم الرجل الصناعية ومكانش عنده أى احساس بالحرج ..
الجرى حوالين كندا مكانش مجرد رياضة ، تيرى كان بيجمع دولار من كل مواطن كندى يقابله ، و قرر يدفع المبلغ ده عشان يقضى على الوحش اللى بيهاجم شباب كتير وبيقتل أحلامهم، لحد ما جمع 28 مليون دولار واتبرع بيهم لمراكز أبحاث علاج السرطان
تيرى عاند السرطان عشان يحقق حلمه، لكن للأسف السرطان انتقل لرئته كمان ، وبدأ ينتشر فى أجزاء جسمه كلها لحد ما مات بالبطئ ! وتكريما لدوره وإصراره فى كندا عملوله تمثال تخليداً لذكراه ..
صحيح تيرى مات بس لحد دلوقتى فى أكتر من 60 دولة حول العالم بيستخدموا الفلوس اللى جمعها فى علاج السرطان، ده غير ان اتعمل ماراثون باسمه بيتعمل سنويا ويعتبر من أكبر ماراثونات الجرى وأشهرها حول العالم ، وفى الماراثون ده بيتم جمع التبرعات لعلاج السرطان زى تيرى :))
أنت هتعمل ايه يرتبط باسمك بعد ما تموت ؟
الأربعاء يوليو 15, 2015 7:36 pm
