زوادة اليوم: عمل الخير

زوادة اليوم: عمل الخير

بيخبّرو عن رجّال حكيم كانو كل أهل الضيعة يستشيروه عند أيَّ صعوبة بتِعترضُن. بيوم من الإيام إجو لعندو وسألوه: «يا معلّم أيمتين مِنخَبّر عن أعمال الخير يلّي عملناها»؟
الكلّ كانو ناطرين يقلّن ما تخبّرو عن أعمال الخير يلّي بتعملوها، لازم تتعلّمو من الرب يسوع ما تخلّو إيدكُن الشمال تعرف شو عملِت إيدكُن اليمين.
إنما بعد صمت، جاوب الرِجّال الحكيم وقال: «قدّام الناس البُخَلا يلّي ما اختبرو جمال عمل الخير، لازم تخبّرو عن أعمالكُن الخيّرة، هيك إذا ما تعلّمو من الكلام بركي بيقتدو بالأعمال».
الزوّادة بتقلّي وبتقلّك
ما تقلّل من أعمالك الخيّرة، بس ما تفاخر فيها قدّام الناس. إنما مرّات لازم تِظهرها للعَلن لأنّو المتَل بيجِرّ، وأكتر من هيك بيِعدي، والله معك.