بدك تتعرف ع حرية يسوع و تموت متلو انسان حر ؟
يسوع انسان حرّ
شو يعني انسان حرّ ؟
كيف كانت حريتو ؟ و وين نحنا من هالحرية ؟ اذا بدنا نمشي مع المسيح علينا نحمل متلو صليب الحب و الحرية ليش؟
الأنسان الحر هوي الأنسان يلي مش بحاجة لأيا شي هوي الأنسان اللي بعيش رغبة الحب و ما بينطر من هالحب ايا شي بالمقابل
قدام الصليب وقفة الضمير و صرخة الحقيقة
قدام صليب الحب انكشفت المجانية
حب بدون مقابل
والحب اللي بينزرع بالقلب بينحَصَد اضعاف
قدام الصليب بدنا نتشبه بالموجود عالصليب
الموجود عالصليب كان انسان حر بكل ما بتحمل كلمة حرية من معنى
مصلوب صح لكن حر
لأنو هوي اللي قال انا عندي سلطان انو اعطي حياتي و عندي سلطان انو تبقى معي يعني يسوع عطى حياتو و سلم هوي حالو من الحب و هيدي حريتو
عالصليب يسوع رغم كل الحكي يلي كان موجه الو بقي ثابت و غفر ... حر ما بيتأثر بحدا
حر من اي ارتباط بشري سلم امو لتلميذو بحرية
حتى بيو اللي بالسما قلو ليش تركتني ؟ و بقي حر
و قدم حياتو لبيّو لما تمم كل شي
لنفهم الصليب منقدر نكتشف القيامة و النور
بس ايا نور ؟
اعظم من نور الشمعة و الشمس
نور المسيح يلي ضوا ظلمت القبر
و هون دورنا نكون نحنا قلب مليان قيامة و نور
قلب عبابو في بشارة حلوة في حياة
ولا قبر ميّت بيحوي المسيحي لأنو ابن النور
المسيحي اليوم وين من بشارة القيامة و حقيقة النور و الحب و الصلاة ؟
بالقيامة انجبلنا بالحب انختمنا بنور الحياة
لنوصل للقيامة في مسيرة موت لازم نمشي فيا لنقوم اذا منآمن بيسوع بحريتنا بإرادتنا بثباتنا
منشهد و منصرخ صرخة الرجا صرخة تلمذة جديدة
بمدرسة الصليب بمدرسة الحب
القيامة اذا ما عشناها من قلب الحرية و الحب
علامة استفهام كبيرة ع قلبنا اليوم
علينا نحب لنكون بقلب الله
علينا نحب لنفهم الله
علينا نعيش انسانيتنا بملئ الحب
بنعمة الوقت الحاضر بالإستسلام المطلق
و الثقة بيسوع
المجازفة الكبيرة يلي عملها الله من فيض حبو
هيي لما خلق انسان قادر انو يبني حالو بمعزل عنو
قادر الإنسان يرفض الله و رغم هالشي الله حبنا
و مش طالب منا الا انو نكون بهالعالم
نكون علامة حب و هيك يسوع عالصليب فرجانا قيمتنا الكبيرة انو نحنا بقلبو نور
شمعة بتقدر تضوي ظلمة كبيرة
اذا في ظلام اليوم لأنو نحنا مش عم نضوي
مهمومين تعبانين زعلانين و هوي بيصرخلنا تعو لعندي بقلبي بترتاحو
تعو ضوّو بهالدني نور جديد ازلي
وهون حريتنا يا منقبل النور يا منرفضو ...
الأربعاء أبريل 15, 2015 4:31 am
