زوادة اليوم: الكتاب المقدس
بيقول جون نيومن: «أنا بقرا الإنجيل ت أعرف كيف لازم الناس يعيشو، وبقرا الجريده وبعرف كيف عايشين». سجين بالسجن الإنفرادي سمحولو بنسخه من الكتاب المقدّس ت يكون رفيقو بسجنو. ومن بعد دراسه طويله دامت عدّة سنين حصل هالسجين ع الإحصاءات التاليه: بيتألّف الكتاب المقدّس (يعني النسخه اللي كانت معو) من 3586489 حرف ومن 773692 كلمه ومن 31173 آيه ومن 1189 فصل. واكتشف إنّو الآيه اللي بنصّ الكتاب المقدّس هي الآيه التامنه من المزمور الـ118، وإنّو أطول آيه هي الآيه التاسعه من الفصل التامن من سفر أستير، والآيه الأقصر هي الآيه الـ35 من الفصل الـ11 عند القدّيس يوحنا. معلومات مهمّه بس ما تفكرو إنّو هالسجين تأثّر بشي كلمه من كلمات الكتاب المقدّس. كتير مهم إقرا إنجيلي كل يوم، إنّما الأهم قدّيش عم بستوعب منّو وقدّيش عم بستفيد من كلمه اللّه المكتوبه كرمالي ت إتعلمها وإحفظها وعيشها.
الزوّاده بتقلّي وبتقلّك، متل ما بيقول وليام هيوتن تمسّك بالإنجيل لغاية ما الإنجيل يتمسّك فيك.