زوادة اليوم: الأحكام المسبقة

زوادة اليوم: الأحكام المسبقة

بخبّرو عن شَبّ إنو بيوم من الإيام اتّصل بأعزّ صديق عندو وقلّو: «أنا بحاجة ل300 دولار»، بيجاوب الصديق: «نص ساعة وبيكونو عندك». بس مع الأسف النص ساعة مرقِت والصديق ما وصل، جرّب يتّصل فيه خطّو كان مسكّر، جرّب مرّات كتار نفس النتيجة الخطّ مسكّر. بيقرّر يبعتلو رسالة يقلّو أنا مَني بحاجة لمصرياتك، ما في ضرورة تسكّر خطَّك، بعد وقت قليل اتّصل فيه رفيقو وقلّو أنا واصل لأعطيك المصريات، وخلال الحديث بتوصلّو الرسالة، بيعتذر وبيقلّو وصلتني رسالة ممكن اقراها، وبعد القراءة بيقول لرفيقو الله يسامحك، أنا ما سكّرت الخط لحتى إتهرّب منك، سكّرت الخط لحتى روح بيع التلفون وجبلك المصريات، وبالباقي بشتري تلفون مستعمَل لأتّصل فيك وقلّك أنا واصل لأعطيك المبلغ يلّي طلبتو منّي.
الزوّادة بتقلّي وبتقلّك
لما بتحكي، حكِي من قلبك، ولما بتطلب طلوب بأدَب، ولما بتعتذر اعتذر بصدق، ولما بتفكّر بغيرك ما تظن السوء وما تلوم الغايب إلا ما يحضر، والله معك.