توعظ وتعلم ف الناس

توعظ وتعلم ف الناس
وإنت اساسا مليان شر
تتناول من خبز وكاس
ضامن قال توصل للبر
تفتح فاك وتقول تسابيح
وترنم وتقول الحان
عامل نفسك شخص صريح
وإنت بالأكاذيب مليان
وبتظهر بوجه ملاك
وإنت لابس تحته قتاع
وإنت آساسا ابن هلاك
ومزيف لواع خداع
جوة البيت ضرب وإهانات
وشتيمة تطلع زى السم
غرقان دايما فى ملذات
تحفظ ف خطايا وتصم
وبتكتب مواضيع روحانية
والناس تمدح فيك وتكرم
برضو تشوف مواقع اباحية
وتبص وعنيك تتخرم
وايا الناس عامل متواضع
بتمثل الدور بشياكة
وف ذهنك وف عقلك واضع
كلامك يكون بلباقة
واخد صورة الحمام
شايفينك امور وبسيط
فاكرينك عايش ف سلام
وانت شرك يملا محيط
تتكلم ببراعة وكأنك
متميز جدا وحكيم
عامل نفسك سابق سنك
بس اسلوبك بجد عقيم
عامل قاضى بتحل مشاكل
متخضرم كتير وخبير
والشياطين ربطاك بشناكل
كداب اوى وابوك شرير
دايما ماشى كأنك صح
ولا عمرك ع غلطة ندمت
وبتزرع دايما بالشح
ولا عمرك يوم إتقدمت
عارف غلطك وماسك فيه
عارف إن حياتك دون
والحمل ع الدهر حانيه
اصلك يابنى بقيت ملعون
واوعى تقول انا أعمى كفيف
والشياطين غمالى عنيا
ده انا اصلا طيب وعفيف
بس الشياطين ماسكة ايديا
انت آساسا شرير عاصى
مش عايز من الوحل تقوم
خاطى جدا على نفسك قاسى
بتبلط فى الشر تعوم
كام مره سمعت كلام ربك
كام مره قريت الإنجيل
قالك اوعى تقسى قلبك
وافتحلى ده انا عمانوئيل
سديت ودنك قولت هاطنش
وافتح ليه ماانا كده مرتاح
أصلا ربى عليا مارنش
ما انا واد كول عايش ف براح
وبتنصح غيرك انه يتوب
وإنت ف دنسك كده غرقان
وبتعمل خطايا وذنوب
تعف عن سماعها اذان
الكلام ده بقوله لنفسى
لازم اتغير لازم اتوب
وانا ع كده قولت اللى ف نفسى
من اليوم راجع للمصلوب
عن شهوات الكون مصلوب
مش راح تانى اعيش مغلوب

اشكر حضوركم الجميل

الذي اضاف لموضوعي

روعة وجمالا