ساكت ليه ما تتكلم قول واشكى براحتك
انا معاك سامعك بتتألم انا كل اللى عاوزه راحتك
طاير ليه بجناح مكسور ومحسسننى انك فرحان
عارف قلبك بقى مكسور وبحسك ع طول سرحان
انا جنبك متخافش اطمن ومتزعلش
ده انا لمه بشوفك زعلان مبقدرش
اعمل اى حاجه ولا حتى اعيش
انا ف الدنيا دى غيرك ماليش
ليه بتحلم احلام كبيره متقدرش تحققها
وكل كلمه صغيره او كبيره لمه تسمعها تصدقها
عارفك اتعودت ع الوحده وبقيت حاجه اساسيه
وان الناس الغاليه عندك بقيت فعلا مش هيه
شايفك باصص ف المرايا وبتسئل ايه اللى حصل
وانك متاكد ان الموت بقى بالنسبالك محتمل
خربوش ع خربوش بتنجرح والجرح عمال بيزيد
هتحوش ايه ولا ايه طب من القديم ولا الجديد
جواك كلام كتير بس مش عارف ازاى تقوله
وغرقان ف بير ضلمه والفرح مش قادر تطوله
طول ما انت لسه عايش متخافش هتلاقى النور
وانا معاك ايد ع ايد واحنا الاتنين هنهد السور
سور الحزن وسور اليأس وهنبنى اسوار جديده
سور الفرح وسور الامل والاحلام مش هتبقى بعيده
وهنبقى مع بعض ع طول مهما الوقت يطول
لو حزنت ف يوم عن ساعدتك هاكون مسئول
لو صاحب ف يوم باعك انا مش هقدر ع خداعك
لو حبيب سابك عشان حد انا مقدرش ع غيابك
كل لمه تقع انا هقومك وبايدى الاتنين انا هاسندك
وهفضل معاك وهحاول بأى طريقه اسعدك
الماضى مع بعض هنودعه وصوت الصراخ مش هنسمعه
والباب لو فضل مقفول قدامنا بمفتاح الصبر هنفتحه
نفسك تسمع حد يقولك متخافش اطمن انا جنبك
وانا حاسس بيك وجيت قولتهالك لان انا قلبك
السبت فبراير 14, 2015 12:09 pm
