زوادة اليوم: انا مني مغلّط
بيخبرو عن تلات ولاد زغار، كانوا عم بينِطّو على التخت، ومن كتر ما نَطّو، انكسر التخت.
ركضت الإم على الصوت، لتشوف شو القصة، بتقول لولادا التلاتة: «إنتو مقاصَصِين». بيطلب الإبن الزغير إنو تسمحلو يحكي، بيقلّا: «أنا ما خصّني لأنو لـمّا انكسر التخت أنا كنت بالهوا».
الزوّادة بتقلّي وبتقلّك «نحنا هيك، لـمّا خرب البلد كنّا مسافرين، ولـمّا فشل مشروعنا كنّا عم ندرسو... والأمتلة ما بتخلص. ومننسى أو منتناسى إنو تقصيرنا وأغلاطنا، حتى لو كانت زغيرة، إذا منجمعها مع بعضها قادرة تخرب الدني!»
الأربعاء مارس 18, 2015 5:28 am
