زوادة اليوم: كلام الناس

زوادة اليوم: كلام الناس

يمكن، لا بل أكيد، هالقصة سامعينها من زمان كتير بعيد، بسّ بعدها لليوم عَم تحكينا وتقلّنا شو بدكُن بكلام الناس؟
بيخبّرو إنّو في رِجّال رايح من منطقة لمنطقة تانية، ومعو إبنو وحمار. كانو البيّ وإبنو عم يمشو وماسكِين الحمار وراهُن. صارو العالم يضحكو عليهن: «هَودي أغبيا، معُن حمار ومش راكبين عليه»! تَ يرضي العالم، طلع البيّ عالحمار والإبن كمّل عَم بيجرّ الحمار. صارو العالم يقولو: «شو بلا قلب هالبَيّ، هوّي مرتاح وتارك إبنو يهلك عالطريق». تَ يرضي العالم، نزل البيّ عن الحمار وطلّع إبنو، وكمّل البيّ مَشي عَم يجرّ الحمار. صارو العالم يقولو: «شو بلا قلب هالصبي، هوّي مرتاح وتارك بيّو يهلك عالطريق». تَ يرضي العالم، طلع البيّ وإبنو على الحمار، صارو العالم يقولو: «شو مجرمين هالرِجّال وإبنو، حرام، عَم يهلك الحمار عالطريق»، بالآخِر حمِل الرجّال وإبنو الحمار وكمّلو الطريق.
الزوّادة بتقلّي وبتقلّك
يمكن تضحك لما بتسمع هَيك قصة، بس إذا بتفكّر فيها بتعرف إنّو ما لازم تسمع حَكِي العالم، وإلا بتصير حامل أحمال الدِني على كتافك، بِدعيك تفكّر بهالقول: «خلّي كلام الناس يأثّر فيك، بقدر ما الميّ الحلوة بتتأثّر بملوحة البحر»، والله معك.