زوادة اليوم: الصفة والاسم
الخبريّه بتقول إنّو الملك اسكندر الكبير كان عندو قائد جيش جبان وما بيقدر ياخد موقف بالأوقات الصعبه. اشتكو عليه قاده الجيش عند الإسكندر العظيم، زعل الملك وقرّر إنّو لازم يغيرّ شي بهالقائد. صار يسأل عنّو وتفاجأ إنّو إسمو اسكندر. ندهلو وقلّو: «شو إسمك»، جاوب: «اسكندر» سألو: «بتعرف أنا شو إسمي». جاوب وقال: «اسكندر»، ساعتها قلّو الملك العظيم: «لازم تغيّر أمر من تنين، أو إسمك أو تصرّفاتك».
الزوّاده بتقلّي وبتقلّك، انتبه المسيح القايم من الموت واقف قدّامك وعم بيقول: «إنت مسيحي وحامل إسمي يا بدّك تغيّر إسمك، يا بدّك تغيّر تصرّفاتك»، ما تتأخر لازم تختار.
السبت يونيو 13, 2015 4:29 am
