يا هالماضي اللي ما بتتركنا ...
بتضلك حاضر ومنأزنا
ارتحلك بقى شي شوي
تهدى وفارق خواطرنا ..
يا هالماضي الكنت النا
وما عاد غير السفر ع مفارقنا
قديش بدو يحمل بعد هالقلب
حتى تعبت منا سنين المرجلي
والحرب
وما كنت تتعب انت وتغادرنا
قلنا شوي بتطل وبتغيب
بتتطمن حقك ع الحبيب
غليّت لأحلامك المكاتيب
تودي آه ونهدات بتجيب
لحتى انكوت بالفرقة دمعتنا
يا هالماضي في الي معك رحلي
بافراح بعذابات بنهدات بأشواق
بعصارة عمر بعيون عم تحكي
وتخبّر عن هاك الايام وبتشتاق
تختصر سنين وتمحي قسا الفراق
ويرجّع صفا اللي راح ويحاسبنا
ويا ريت انا بس لو فيي
اركض ورا فراشات البريي
اتخبى وضيّع المسافات
وإغرق بحروف منسيي
وكفّي الدرب من دون آهات
وإرجع متل ما كنت بالحزات
أهرب وعربش وإغفى بين
اغصان شجرتنا
ووشوشها وقلها إصحا إصحا
الهوا المجنون يهب عليك ويكشف
سرّ قعدتنا ....
بس العمر غدار
ورسايلو كتار
عرف كيف يدوزن الاوتار
ويحمّل احمال بينوء فيها
القاهر الجبار
ويرمي سلاحو بأول المشوار
وبسلّم أمرو
وينحني قدام قوتنا
وبعدك يا هالماضي المحتار
بتطل علينا ومن هاك الجرار
بتسقينا وما بترحم دمعتنا ....
الجمعة أكتوبر 17, 2014 7:28 pm
