أصابع اليد الخمسة

زوادة اليوم:

بيخبرو انو مرة تخانقو أصابع الإيد الخمسة مين منن الرئيس! قال الإبهام تطلعو منيح كيف أنا بعيد عنكن كأني وحدي، كلكن بميل و أنا بميل أكيد أنا الأهم بيناتكن! بيرد السبابة لأ يا حبيبي أنا الآمر و الناهي أنا الأهم! بقول الإصبع التالت عم تتخانقو عالفاضي أنا أطول شي فيكن ليك كيف مبينين متل الأقزام كيف الكن عين تقولو انكن أهم مني! بجاوب البنصر بس ذكروني مين اللي الو شرف خاتم الزواج؟ ولا واحد منكن أنا بس عندي هالميزة! شوي بيتعجبو كلن بس سمعو صوت الخنصر انو بعد ناقص هالزغير! بيقلن أنا مني ضخم متل الإبهام ولا بعطي أوامر و مني طويل و ما بتزيني الخواتم، بس أنا كل ما تعبتو انتو و عم تشتغلو شي بتلقو عليي و أنا بسندكن...أنا خادمكم! و وصانا الرب ان اردتم ان تكونوا عظماء كونوا خداما صغار! الزوادة بتقلنا هيك نحنا لازم نكون متل الشمعة اللي بتدوب تا تضوي لغيرا و متل هالخنصر بالرغم من زغرنا و ضعفنا نخدم خينا الإنسان من كل قلبنا و أجرنا عند الرب! نهار مبارك للجميع