زوادة اليوم: ثلاث قلوب
بأحد الإيّام كان في ولد عم بيفلفش بكتب بيّو، وبيّو إستاذ فلسفه كبير، وبيوقع نظرو ع مقاله بتحكي عن الرّوح والجسد والقلب والإحساس. بيروح لعند البيّ وبيقلّو: «يا بيّي اشرحلي»، بيبلّش البيّ بالحكي عن القلب وأهميّتو وبيقلو للإبن: «يا ابني لازم يكون في عنّا 3 قلوب». الإبن بيندهش وبيصرخ: «كيف هالحكي؟». بس البيّ بيكمّل وبيقول: «قلب من لحم ودم حتى نحبّ البشر، قلب من نار حتى نحبّ أللّه، وقلب من تنك حتى نحبّ المال». سكت الإبن والسكوت علامة الرضى.
الزوّاده بتقلّي وبتقلّك ما تخاف تكون صاحب تلات قلوب وإذا قرّرت تستبدلن بقلب واحد بتنصحك بالقلب يللي من نار لأنو يللي بيحبّ اللّه ما فيه إلّا ما يحبّ الإنسان ويحتقر المال.