شربل خلي قلبك ع قلبي
رسالة من السما للأرض، للشعب الجاهل هالشعب اللي ما بدو يفهم ولا بدو يتعلم و بيبقى السؤال شو يعني شعب جاهل؟
قديس من لبنان، رسالة من السما للأرض، للشعب الجاهل هالشعب اللي ما بدو يفهم ولا بدو يتعلم و بيبقى السؤال شو يعني شعب جاهل؟
خلينا نتأمل مع القديس شربل لنقدر نستخلص اجوبة نستفيد منا
الشعب الجاهل هو يلي ما بيعرف إنجيلو، جهلك بينقاس بمعرفتك لأنجيلك يلي بعرّف عنّك وعن دينك.
من عنايا من أرض الإيمان، السلام، المحبّة الأرض يلي ما منسمع فيا غير همسات من الصّلا، تبشير بإسم الله، هون، من عنايا، الله اختصر السما عالأرض،
الناس بتضل تسأل إذا في عالم تاني؟
العالم التاني أي موجود. موجود ليفرجيك الحقيقة، حقيقة وجودك يلي عشتا عالأرض. كلّ واحد منا بحقلو يوصل على هيدا العالم التاني، عالم الحياة الأبديّة، عالم الله. وكرميل توصل على هيدا العالم ما في غير طريق واحد وهو طريق الرب، هيك كان يقول القديس شربل. تتوصلوا على طريق الرب لازم تبطلوا تنزلوا نزول، تضيعوا بالمشاكل، بالأغلاط، بعدم الإيمان، بالشك، لازم تبلشوا تتطلعوا طلوع.
صحيح إنّو السفر بسفينة الرب منو هيّن، بتواجه صعوبات كتيرة بس وصولك بكون أكيد. عدم إنكسارك أكيد. عيشوا حياتكن بحب وإيمان، ازرعوا الأرض صلاة وبخور وكونوا رهبان بقلب العالم تمسكو بالكلمة و تحررو و خلو قلوبكن ع موجة قلب الرب
كتار يلي بخافو انو ما يوصلو لأنو ما بيملكو شي هون على كل انسان يتأمل و يتذكر هالقديس يلي تَرك كل شي ومشي حامل معو بس إيمانو، نسي كل شي إِلَّا إيمانو. هالقديس يلي الله تركو رسالة لكلّ واحد منا، لكلّ واحد موجوع، لكلّ واحد مكسور… تَركو لعينينا نور. و كل قديس هوي علامة لحضور الله و نعمتو اللي دايما بتفيض عكل قلب مستعد و بدو ياها علينا نطلب منلاقي
مع شربل بصمت منتأمل بيسوع
مع شربل منصلي بتواضع ومنمشي معو و مع مريم امو و امنا لتعلمنا و تدلنا ع يسوع
شربل خلي قلبك ع قلبي
ليضل قلبي يدق و كل دقة متل صوت الجرس تدل الناس ع بيت الرب
شربل خلي قلبك ع قلبي ليصير قلبي انجيل زغير حيّ وين ما بكون
شربل خلي قلبك ع قلبي ليضل لقلبي هدف
واسم هالهدف يسوع
الإثنين يوليو 25, 2016 11:57 pm
